eSIM install kaise karein?

Shuru karne se pehle

Install karte waqt WiFi par rehna behtar hai. eSIM download hone ke liye internet chahiye, aur us waqt aapke phone mein data chal nahi raha hota.

QR doosri screen par kholein — laptop ya kisi aur phone par — taake aap usay scan kar sakein. Agar doosri screen nahi hai to QR ki image apne phone mein save karlein; har phone gallery se bhi QR le leta hai.

iPhone par

1. Settings kholein, phir Cellular (ya Mobile Data) pe tap karein.
2. Add eSIM pe tap karein, phir Use QR Code.
3. Jo QR hum WhatsApp pe bhejte hain, use scan karein.
4. Plan ka naam rakh lein — 'eJurs' theek hai — aur setup mukammal karein.
5. Cellular Data mein eJurs line chunein aur Data Roaming on kar dein.

Samsung par

1. Settings kholein, phir Connections, phir SIM manager.
2. Add eSIM pe tap karein, phir Scan QR code from service provider.
3. Jo QR hum WhatsApp pe bhejte hain, use scan karein.
4. Add hone ke baad eJurs line ko mobile data SIM set karein.
5. Usi line ke liye Data roaming on kar dein.

Google Pixel par

1. Settings kholein, phir Network & internet.
2. SIMs pe tap karein, phir Download a SIM instead ke saath + dabayein.
3. Jo QR hum WhatsApp pe bhejte hain, use scan karein.
4. eJurs line ko mobile data SIM set karein.
5. Usi line ke liye Roaming on kar dein.

Koi aur phone

Xiaomi, Oppo, Vivo, Huawei aur OnePlus mein tarteeb thori si alag hoti hai, lekin qadam wohi hain:

1. Phone ki network ya SIM settings kholein.
2. Add eSIM, Download a SIM ya Add mobile plan dhoondein.
3. QR code scan karne wala option chunein.
4. Jo QR hum WhatsApp pe bhejte hain, use scan karein.
5. eJurs line ko data SIM set karein aur data roaming on kar dein.

Data Roaming on karna zaroori hai

Ye wo qadam hai jo sab se zyada chhoot jata hai. eJurs roaming eSIM hai, is liye Data Roaming band ho to eSIM install hone ke bawajood internet nahi chalega.

Fikar na karein — is se koi extra charge nahi lagta. Aapne jo plan liya hai bas wohi chalta hai.

Agar internet phir bhi na chale

Tarteeb se ye dekh lein:

• Mobile data on hai? Aur data ke liye eJurs wali line select hai?
• Us line par Data Roaming on hai?
• Ek baar Airplane mode on kar ke off kar lein — network dobara register ho jata hai.
• Phir bhi na chale to phone restart karein.

In sab ke baad bhi masla rahe to WhatsApp par message karein. Hum aapki eSIM apni taraf se dekh sakte hain.

eSIM install ho gayi lekin "No Service" dikha rahi hai?

Pehle dekhein ke eJurs wali line on hai aur mobile data ke liye wohi select hai. Phir us line par Data Roaming on karein, aur ek baar Airplane mode on-off kar lein. Phir bhi na chale to WhatsApp par message karein.

Data Roaming on rakhein ya off?

eJurs wali line par on. Ye roaming eSIM hai, is liye roaming band ho to internet nahi chalta. Is ka koi extra charge nahi — sirf aap ka plan chalta hai.

Ek QR kitni baar install ho sakta hai?

Ek baar. eSIM install hone ke baad wo usi phone se juri rehti hai, is liye QR kisi ko bhejein nahi aur phone badalne se pehle humein bata dein.

Kya purani SIM nikalni paray gi?

Nahi. eSIM doosri line ki tarah saath chalti hai. Calls purani SIM par aati rehti hain aur internet eJurs par.

Install ke baad QR ki zarurat hai?

Nahi, lekin usay save rakhein. Agar kabhi phone reset karna paray to support se baat karein — dobara wohi QR kaam nahi karega.